Revelation of John 11
A Bakovi ala Rua Ru Vakalongo a Ngava
1 aMuri ni habi nau a lebo ne vona ni rovai a maki, i manga a kodo na nilaho, lakea i taki maea iau, “O vano o rovai a niolana, a nibolana roho na Vure turana dede na nihabi. O gi palupu e huriki ri vasileki vonga. 2 bPali naha ni rovai a mataruma, polovavo na Roho na Vure. Naha ni rovai, a vuhuna a tabeke iea ni habi ne huriki i uka ma ria a Iuda, ri gi paha katoa a tanga na Vure ▼ na keva i ravulu va a polona i rua. 3 dGa rudu a bakovi ala rua nau, ru gu taki tala ne huriki a ngava nau. Ru gu rea na varakia katokato, ru gu rata a nita propet na parava i 1,260.” ▼4 fA bakovi ala rua nga, rua a kai a oliv i rua, a butu na nipara i rua, ra ri pesi na matana Vure, re Bakovi Dagi na tanga lobo na malala. 5 gE rei a viri i ngaru ni rata hale rua, a kanono bara i pagitala na ngavane rua, bara i gutu parina e huriki a pile ne rua. E huriki ri ngaru ni rata hale rua bara ri mate vona a naro iea. 6 hRu tahoka a nitora ni tukaria a hunu, i uka ma ge boru a vala na parava lobo ru rata a nita propet. Ru tahoka a nitora ni rata a maka naru ri gi mapulo manga a dara. Ru tahoka a nitora ni ratapile a malala na vuranga legelege, na ningaru ne rua.
7 iNa tahuna ru vakalobo a leho ne rua ni ta propet, e Livoa bara i sike valai na lovo i marangeo, bara i vaubi turane rua. Bara i mulangi, i rabalaki rua, 8 jlakea a podane rua ru gu tabuli na rosi na tanga dagi, ra ni ta vakakika vona e Sodoma, e Egipto, na tanga ni paditata na kai tavalavala a Bakovi Dagi ne rua. 9E huriki a bakovi a ngatavine na kuli lobo, na kabu lobo, na tabele lobo, na robo lobo na malala ri gi matanono a podane rua na parava i tolu, a kalavana. Ri gi hate kari, nahea ni gi tanu rua. 10E huriki lobo na malala ri gi vivi hateka na matenga ne rua. Ri gi rata a habu dagi, ri gi vahabi a maki, a vuhuna a propet ala rua nga ru habi a nimadihi dagi ne huriki na malala, ru mate pali.
11 kPali muri na parava i tolu, a kalavana, a Vure i bango dili ne rua a bangona na nimahuri, ru pesi rike. Lakea e huriki lobo ri matai rua, ri mangenge hateka. 12 lMuri ru longoa a lohona viri na hunu i ta dagi, i taki rua, i ta maea, “Muru sike valai!” Lakea ru sike na hunu turana bubu, pali e huriki a pile ne rua ri matanono kunana.
13 mNa tahuna iea kunana a vuruke dagi i pori. A tanga dagi ni nagi na tabeke i ravulu. A tabekena tara, a roho lobo ri mapuka puru. A bakovi a ngatavine ala 7,000 ri mate na vuruke iea, pali e huriki ri tabana ri mangenge hateka, ri vakabagetua a rana Vure na hunu.
14 nA ruana vuranga i lobo ngane. A toluna vuranga i popote ge valai.
A Poloruana Tavure
15 oMuri, a poloruana agelo i vakia a tavure vona. Lakea a longo e huriki ri ta dagi meli na hunu, ri ta maea,“A harikianga na malala ngane ne vona e Bakovi Dagi ne hita, turana e Kristo ▼ vona.
Ge matakari na parava vakaroro, i uka nilobona.”
16Lakea e huriki a nupesi ala ravulu rua a polona i va, ra ri made na matana Vure na gula hariki ne ria, ri tabuli puru na matane ria, ri kavurikea a Vure, 17ri ta maea,
“O Bakovi Dagi, Vure Tuhaka Hateka, mi kavurike ioe.
O made ngane. O made hosi.
O vakasiri a nitora dagi vomu,
o vakatubu ni matakari.
18 qE huriki i uka ma ria a Iuda, i madihi a hatene ria, pali a rongova vomu i bele.
A parava i bele pali, go pelekado e huriki ri mate pali,
go rata kamumu e huriki a vora vomu, re huriki a propet,
e huriki a tara na Vure, e huriki lobo ri togoa a ramu,
e huriki a bakovi tavula, e huriki a bakovi dagi.
A parava i bele pali go ratapile e huriki ri ratapile a malala.”
19 rMuri a Roho na Vure meli na hunu, ni tala. A Tava na Ngava Dagi ni matai i tabuli pololilo na Roho vona. A vila i maravila, i kururu, i pelaka, a vuruke i pori, a vala kedo dagi i boru.
Copyright information for
BNP